نعمل لبعض.

قام الصيدلى من جلسته بسرعه لمقابلة القادم بسرعه فقد تكون الحاله فى حاجه إلى سرعه . تكلمت القادمه بسرعه:
شوف ياسيدى هاجيب لك دوا وآخد مكانه أدوات تجميل ومعاجين.
رد الصيدلى بسرعه : أنا لا أتعامل فى هذا .
: ليه دا الدكاتره ما بتصدق .
خلاص روحى ليهم وريحى نفسك وريحينى .
تبدل حال السيده من الإستعلاء الى الإستجداء .. وقالت بصوت ضعيف دا أنا غلبانه , جوزى مات وسابلى تلات عيال وأمه , أمه مُتعبه خالص , ولاد الحلال اللى زى حضرتك ساعدونى .. جابولى موافقة كشك م المجلس وناس طيبه قوى زى حضرتك ساعدتنى إن الشئون تعمل ليّه كشك أمام باب المستشفى .
فيه ناس بقى برضه طيبه زى حضرتك إدونى كارنيهات التأمين الصحى بتاعهم عشان اصرف الدوا وأبيعه رُحت لدكتور التأمين ربنا يباركله شبه حضرتك خالص .. إنتم إخوات .. الراجل لما عرف حكايتى قال لى هايساعدنى ويكتبلى أغلى دوا وياخد ع الكارنيه عشره جنيه .
أخدت الدوا ورحت الصيدليه اللى هناك الدكتور الحرامى أخد الدوا بنص تمنه .. تصدق .. ناس قالت لى :لأ. .بدل ما تبيعى الدوا وتخسرى بدليه بحاجات تبيعها فى الكشك أحسن .. قلت أجيلك وأخدمك إنت أحسن م الضلالى اللى بيقاسمنى فى رزق عيالى .. ربنا يبتليه بحما زى حماتى تطلّع عينه.
: سيدتى أنا خارج هذه الحكايه تماما .
: ربنا يوقف ليك ولاد الحلال .. والله دا أنا ظروفى صعبه . وأمسكت بتشابك أصابعه .
:ياستى الموضوع دا غلط على الأجزخانه وعليه ..
طيب المره دى بس عشان خاطر ربنا .. أنا سايبه العيال لوحدهم فى البيت وستهم راحت تقبض المعاش م البوسطه .
: دى أول وآخر مره.. هاتى اللى معاكى .
:خد. هات .... وهات..... وهات....وهات....
: خلاص كده .. الحاجات دى بتمن دى.
: مش هاتعملّى خصم .
: خصم على إيه إرحمينى ..
: طيب أنا لما أبيعهم زى ما أخدتهم .. أكون كسبت إيه .
: ياستى الله يسترك إنتِ مادفعتيش حاجه فيهم .
: إزاى .. دا أنا دافعه عشره جنيه للدكتور ع الكارنيه حار ونار فى جتته.
: مش شغلتى ماتتعبيش أعصابى ع الصبح .
: ما ينفعش .. لازم تعملى خصم .. طيب أقولك .. عشان خاطر العيال اليتامى ربنا يخليك لعيالك.
: ياستى ما ينفعش .. الناس التانيه بتاخد منك خصم مش بتديكى.
: طيب أقولك تعالى نعمل لبعض .
: نعمل إيه .. ربنا يهديكى ..
: نعمل لبعض خصم .. أنا أعملك خصم وإنت تعملى خصم ..
: يبقى كده بنضحك على بعض .
: ما الناس كلها بتضحك على بعضها إنت مش عايش فى الدنيا ولا إيه ..دا حتى الحكومه بتضحك علينا وإحنا بنضحك عليها هيه بتسرقنا وإحنا لازم ناخد حقنا ..
من ‏السيد غنام‏ في ‏‏26 يناير، 2012‏، الساعة ‏07:26 مساءً‏